ТҰРАҚТЫ ТІРКЕСТЕР

Қорқытпақ болып, желкесін күдірейтті. ~ Механик, электрик боп істейтін, орыс, хохолы аралас, бес-алты еркек бар еді, желкелерін күдірейтіп ашықтан-ашық сес көрсетуге көшті. Т.Сәук. ~ … Ботпай екі серігінің ерегісін естіп, қолындағы қамшысын көтеріп, сес көрсетті… О.Сәрс.

Сергіп, марқайып, рухтанып қалды. ~ Арыздасқаннан кейін де жазылып кетуге болады екен ғой деген бір үміт жүрегімізде тұтанып, кәдімгідей серпіліп қалдық. Т.Әбд. ~ Елге жетіп, жақын- жуықтарымен қуана қауышты. Аз ғана күн ауылдан ұзағанда елді, жерді қатты сағынып қалыпты. Ауылдың ауасын жұтып, суын ішіп, кәдімгідей серпіліп қалды. Ү.Жәл. ~ Тынши қалған жұрт Павлодар трактор заводының көтеріңкі міндеттемесі туралы киножурналдан жыланбауыр көк тракторларын танып әжептәуір серпіліп қалды. К.Хам. ~ Көңіл күйі де бүгін өзгешелеу екен. Теңертең әжесі ескерткен бір жай жан дүниесін аударып, басқа бір арнаға салып жібергендей болған-ды… соның арқасында аржағына саңлау жүгіріп, сәлде болса сергіп, серпіліп қалды. С.Үс.

Ашуы басылып, зілі қайтты. ~ Люда екеуі Сәнияны жылатып тынғанымен, Ленаның қайсарлығына "тұмсықтары тиіп", сестері қайтып, айтарын айта алмаған соң Құралай іштей мүлде қатая түскен … Ә.Тар. ~ Күші қайтты ма, сесі азайып әруағы қашқаны ма? Қалаға келсе- ақ құты қашып, берекесі кететіні қалай? Алдымен анау күшік шәуілдеп балағына жармасты. С.См. ~ Жортуын жасаған талай түндерде тобықтан ұрғызып, томардай қулағанында да дәл қазіргідей тоқайраған жоқ екен. Сүлдесі ғана қалып, сесі жоғалған. С.См.

Әлдебір игі өзгеріс, жаңа қарқын, соны талпыныс бар. ~ Алда-жалда көлденең өтіп бара жатқан біреу жөн сұрай қалса, бәрі жамырай сөйлеп, жібермей жарты сағат түсіндіретін. Бүгін күндегідей емес, серпіліс бар. Құнжыңдап әлденені қызу әңгімелеп отыр. Т.Сәу. ~ Мансияның бір байқағаны, әкесі мен шешесі бұрынғыдан ширай түскен бе, әлде көптен көрмегендіктен бе, бойларында бір серпіліс бары сезіледі. АҚ "Өткен өмір…"

Алып ұрды; естен тандырды. * — Обиып отырған жеріңде сеспей қатырайын ба осы, Қобыландыны білмесең, қай жерің қазақ, ей? М.Қаб. * Өзінің түрі адам шошырлық. Құдды ана жылғы Айбаршаның кейпі. Қоразбай қорқа бастады: мына тас маңдайына тисе ғой, сеспей қатады. Б.Тоғ.

Қозғау салды, қарқын қосты. ~ Болашақтың жарқын күнінен жаңа тілек күткен "Елім — айы" мұнда да намысына намыс қосып, арыған елін алдағыға үміт- арманмен қарауды үйреткен. Жабыққан бұйығы жандарға серпіліс беріп, бойына сергектік құйған. С.См. ~ Меніңше, осының бәрі жігерсіздігімізді, өзімізге-өзіміз серпіліс бере алмайтындығымызда жатқан жоқ па? Ә.Ысқ. ~ Кітапта тегіміз Түркі әлеміне серпіліс беру, Түркістанды жаңғырту, өзегіміз ауыл, жер мен тіл туралы, өмірдің мәні неде, жаңа технологиялар, жасанды интеллект, адам геномы, сана ғасыры т.б. туралы ойлар сараланады. /zhasalash.kz/

Ежелгі сенім бойынша тәңірге арналған малды ешкім мінбейді, еркімен жібереді. * Ал, Қоңыржан, сен де разы бол! Менің атымды жылқыға сетер қып жіберіп, көзімдей көріп жүрсеңдер, разымын! Қош, көріскенше күн жақсы болсын!.. Қ.Тол. * – Бұл ел боп мінгізген атымыз, Әсаға. Ал өзіңіздің атыңызды бізге мұраға тастап кетіңіз, ырым болсын. Сетер қып жылқыға жіберейік. Қ.Тол.

Рухын оятты, талпыныс тудырды. ~ «Жеке адамға табынушылық және оның зардаптарын жою туралы» қаулысы жалпы халыққа, оның ішінде әдеби өмірге серпіліс әкелді. Ш.Сари. ~ Бодандық тұсында бостандықтың отын үрлеп оятқан мұндай рухани серпіліс әкелгені үшін де Мұхтарға тағзым. Т.Жұрт.~ Өзге өңірлерде әзірге баламасы жоқ орталықтың ашылуы батыс өңірі ғана емес, барша қазақ елінің рухани өміріне үлкен серпіліс әкелді. Б.Хал. ~ Қорыта айтқанда, Абайдың даналық танымдары қоғамдық санамызға серпіліс әкеле алатын қуатты да шуақты идеологиялық құралымыз. А.Ом. ~ Мұның бәрі қаланың мәдени, рухани өміріне үлкен серпіліс әкелді. Д.Төл.

Қолқа салды. ~ Ендігі бір заматта Қалдарбекке сәбет салғаным бар. Біздің әйелдің алғашқы, тетелес сіңілісін ұзату ыңғайына байланысты. М.Мағ.

Игі бағыттағы қарқынды үдетті. ~ Міне, елге деген, ұрпаққа деген махаббат! Иә, жақсылық сатылмайды. Ол санада серпіліс туғызып, жүректерде бүршік атады екен. Ә.Ысқ. ~ Бұл жаңалықтар бұқара халықтан жаппай қолдау тауып, ел ішінде аз да болса серпіліс туғызған. Қ.Жұм. ~ Ұлттық ой-сананың өркендеуі мен дамуына өлшеусіз еңбек сіңіріп, соны серпіліс туғызған дара да, дана тұлғаның бірегейі. Б.Әбілқ.