Ұзақ жүрістен қорлық көрді, болдырды, запа шекті. ~ Адам өлімі шыбын өлімімен бірдей болған сол бір кенеусіз, тұрлаусыз кер заманға нәлет айтып түнере қалды, бәрі. Табаны тасқа тілініп, өзек-қолқадан қан кетіп, денеден әл кетіп, көздің нұры таусылып, өлім халіне таянғанда, кеудесін сүйретіп киелі Қаратауға, айдын шалқар Көлмекөлге жеткен, көбі артта, ұзақ жолда көмусіз қалған бейбақ ата-баба, ғазиз аналардың киелі аруағына табынып, іштен дұға оқып, тұнжырап төмен қарап қалған. С.Ом. * Алыстарға атылған жырым — жебе, Тасқа әлі де табаным тіліне ме? Р.Ниязб.

Қиындыққа шыдас бермеді, тұрақсыздық білдірді, тайсақтады, жауға төтеп бере алмады. ~ Көшумен күні өткен біздің қазақ, Кез болды бейғамдықтан зор індетке. Мұндай боп жаудан табан тайған ба еді, Жаңбырша қорғасын оқ жауған ба еді. Қожаб. ж. ~ «Сағынбаев» атағын көтерген студент ағам еді. Кеңес адамы болып, дөкей-дөкей қызметтерді атқарды. Бір уезд елді аузына қаратты… Бірақ арты қайырлы болмады, ағамның табаны тая бастады. «Бай баласы» байшыл деген атақты екінің бірі тапты. Б.Майл. * Осынау дамылсыз ілгерілеу үстінде табаны тайып ұшып өледі ме, әлде діттеген межесіне аяқ іліктіреді ме, ол арасын бір Алла біледі. Д.Дос. * Бұлаң құйрық саясатшылар бүлт ете қалса, бүтін бір ел, бүкіл бір халықтың табаны тайып кетері хақ. С.Досан. * Ертең әкелер дәурені өтіп, өз басы жаңағы Ысқақтармен алысатын күн туғанда, ең ақырына дейін табаны таймай, қасында қалатын кім бар? Қ.Жұм. * Адам деген әрқилы деседі, сыртынан қарасаң күн, ал ішіне үңілсең үңірейген қара үңгір ғой деседі, біреудің табаны тайып кетсе, бас салып табалайды деседі. Ш.Айт. * Сен сияқты ерігіп жүрген жоқпыз, қызметтеміз. Суқанымды ұшырдың, пәлекет…— деп, өз сөзінен өзі табаны тайып, тиянақсыз бітірді. М.Қаб.

Сөзі мен ісінің тұрағы жоқ; берік ұстанымы жоқ адам. ~ Е, зулап бара жатқан өмір- ай деген. Табаны тайғанақау шіркіннің, байыз тауып бір тоқтаса, қанеки. К.Сег. ~ Ал өзге үкірдай- зәңгілердің ел шетінен ұзаған сайын табаны тайғанақтап, әртүрлі мінез көрсетіп, қысқа күнде қырық құбылып келе жатқаны рас еді. Қ.Жұм. ~ 90-ыншы қиын жылдары этникалық қауымдардың белгілі бір бөлігі атажұртына бет алды. Бірі күнкөріс қамымен, екіншісі төл отанына деген сағынышпен. Алғашқыларының жайы түсінікті, санасын тұрмыс билейтіндердің табаны тайғақ. А.См.

Әбден қиналды. ~ Елден, үйден адасып, қасқыр жеп кеткен баласынан айрылып, қаңғырып жүргенде табаныойылған, тасырқап болдырған сұлу келіншек Гүлсім ғана бар қасында. Ғ.Біл. ~ Бейшара сарғайды жарма тартып, Жауыр болды арқасы жарма тартып. Табандары ойылып, қолы сойылып, Асты дағы бермейді еш жарытып. "Сейпілмәлік". Жүре алмай қалды. ~ Шыдай алмай 40 шақырым жаяу да сандалған. Содан табаны ойылып, орта жолдаАндреевка селосында жатып қалыпты. Итшілеп жеткенше екі апта өтіп кеткен. К.Қаз.

Әлдебір іске төсілді д.м. ~ Ағайын ішінде нәрсіз көретін адам, Кеңес кезінде әйгілі мылжың белсенді болған. Тамтықты сөзі жоқ, бірақ жала мен пәле іздеуге табаны әбден майдаланған сілімтік кісі еді. Т.Рыс.

Жол жүруге құмартты. * … қайда жол түсер екен деп табаны қышып, балтырын қасып үйіне сия алмай отырған байғұс мұжықтарға: «Барыңдар ана шығыс өлкелерге, батыңдар ана байлыққа!» — деп айтпайсыңдар ма, түге?.. Ә.Кек.

Делебесі қозып, желікті. * … «Кеп қалды, қойыңдар!», «Қойдық қой, болмайды!» деген дауыс шығады. Оған қарайтын адамдар емес сияқты, аналар. Табаны қызып алған тыз етпе жылқыдай жұлқынады екеуі. Б.Қыд. * Міне, қазір де табаны қызып, шабыс тілеген сәйгүліктей ереуілдеп, өз-өзінен тықыршып тұр. Т.Сәу. * Келе-келе тіпті табаны қызып, ауыздықты тарта берген соң Бәйгеторының басын бос қоя берді. Қ.Най. * Бірақ табаны қызып отырған ықпас жігіттің бұл зекірік керісінше намыскер ашуын қоздыра түскен. Ж.Ахм.

Шыдас бермеді, төзбеді, ықты, тізе бүкті. ~ Осындай әдетті күшейтуге себеп болатын күншығыс халқының табиғатында тағы бір мінез бар. Ол: антқұмар, зиннатқұмар, әйелшілдік, адымын алыстатпайтын ұсақтық, қайратсыздық, жалқаулық. Көңілдегісі болмаса, біздің тұқымдар тез табаны қайтып, қажып қалады. Мақсатының жолына құрбан болуға шыдамайды. Бұ да есте болсын. Ж.Айм.

Тұтастай, бақандай, аттай д.м. ~ Бұл жолғасуды ол аңсап күткелі міне енді есептеп көрсе, табаны күректей отыз жыл болған екен. Ғ.Біл. ~ Елтайдан табаны күректей он жас үлкен болса да, әлі бала. М.Қаб. * Әр қыстауға бір соғып жиналыс ашып, жаңа өкіметтің саясатын түсіндіремін деп табаны күректей он күн жатты. Б.Тоғ. * Осы күймен, осы жосықпен айлар, жылдар өте берген. Сонымен, Жаманбай, Айшуақтың есігінде табаны күректей он жылды өт көріп, жиырманың бел ортасынан асып та кеткен. С.Ом. * Бұл жолғасуды ол аңсап күткелі міне енді есептеп көрсе, табаны күректей отыз жыл болған екен. Ғ.Біл. * Адамша бел шешіп жатпағанымызға, адамша беті — қол жумағанымызға табаны күректей бір жеті. Б.Соқ.

Қиындық көріп, қасыреттің дәмін татпаған адамның біреуге жаны күймейді д.м. ~ «Біз қан төгіп, жаумен жағаласып жүргенде, бұл Бекең ауылдағы қыз- қырқынның қалың ортасында қаздай қалқып, үйректей жүзді емес пе» дейді әзіл- шыны аралас. Табаны күйіп, таңдайы тимеген соң біреудің зарын біреу қайдан ұқсын. Ә.Асқ.