АЙТҚАНЫ ЕМ БОЛМАДЫ

Айтқан ақылы аяқ асты болды; еленбеді; көкейіне қонбады, пайдасыз болды. ~ Ағасы Өрденге жеткізіп те, таусылып та айтты және шынын айтты. Шынымен-ақ Күпшек түнеріп алды да, тілазар ініге айтқаны ем болмаған соң, қайта жақ ашпады. Б.Қыд.

АЙТҚАНЫ ЕМ БОЛМАДЫ Read More

АЙТПАДЫ ДЕМЕ

Ескерттім, есіңде болсын деген мағынада. ~ Сен мені бір қатерден құтқардың, – деді ақыры Нұрбек жұқа еріндерін жымқыра түсіп. – Рас. Мен де осылай істеген болар едім… Бірақ… айтпады деме… түбі сені әшкере қылатын адам мен боламын. Т.Әбд. ~ Неге біздің бүркеншек аты-жөнімізді жазғызасың! Айтпады деме, бізге бірдеңе болса өзіңнің көзіңді біз-ақ жоямыз. Компанияға басында қатыстың ба, өлгеніңше сонда болуың керек! Ә.Ысқ.

АЙТПАДЫ ДЕМЕ Read More

АЙТҚАНЫ ЖӨН

Сөзінің жаны бар, біліп айтып тұр д.м. ~ Осы үйде сүтті судай ағызып, майды таудай үйіп қойып отырған кім? Тоғай! Қой, қарағым, менің ақылымды тыңдасаң, осы апамның айтқаны жөн, қолқасы заң! Ә.Тар. ~ Сол Махамбет келген түнде де, таң атқанша ұзақ толғанды. «Махамбеттің айтқаны жөн. Артындағы елдің бірлігін діттеп, сол елмен бірге ханға қарсы аттану керек. Хан ордасын шапсақ, патшасын тағы көріп алармыз!» деп түйген. М.Әбд. ~ Нүркеннің айтқаны жөн, ‹‹Нүркен үшін бақыт іздеймін›› деп айтқан өтінішім бар еді. Бүгіннен бастап қарындасым деп ел аралап, жер кезіп жүріп, оның бақытын өз көзіммен көріп отыруға мен де разымын, ـــ деді Шөке иығын көтере. Б.Жұм.

АЙТҚАНЫ ЖӨН Read More

АЙТСА, АЙТҚАНДАЙ

а). Көңіл толарлықтай екен; расында да мақтауға тұрарлық екен д.м. ~ Ол кісінің бойындағы қайрат, қажыр арғы бабасы Бөлтірік батырдан ауысқан деп ауылдағылар айтып отыратын. Айтса айтқандай, ол кісі әйел болып үй қыдыру, өсек айту дегенді білмейтін, тек істің, шаруаның адамы еді. Б.Тоғ. ~ Ұзын сөздің қысқасы, біз ат басын тіреген үй айтса айтқандай, кім екенін тақадай ұқыптылығымен-ақ көрсетіп тұрған тұғын. З.Нұрт.
ә). Біреудің айтқаны, жорамалы дәл келді. ~ …Айтса айтқандай, қонақтар қараңғы түсе келді. Б.Тоғ. ~ «Қожабектің баласы Болат оқуға алғыр екен, мұғалімдердің өздері қаймығатын көрінеді»,- деуші еді. Айтса айтқандай, институтты айрықша дипломмен бітіріп келді. Т.Әб.

АЙТСА, АЙТҚАНДАЙ Read More

АЙТҚАНЫ КЕЛІП, АТҚАНЫ ТИДІ

Болжамы дәл шықты, шешімі дұрыс болды. ~ Енді тек мына жаз жақсылығымен шығып, орыс ұлығы сөзінде тұрып, жаңа шаһарына шақырып, жарқыратып той жасаса, Әбілқайырдың қуғаны жетіп, қашқаны құтылды, айтқаны келіп, атқаны тиді дей беріңіз. Ә.Кек.

АЙТҚАНЫ КЕЛІП, АТҚАНЫ ТИДІ Read More

АЙТҚАНЫ ӨТІП, АТҚАНЫ ЖЕТІП

Дегені болып, әмірі жүріп (тұр). ~ Болашақ қайындарының айтқаны өтіп, атқаны жетіп тұр. Бабын табудан күдерін үзе бастаған кезде ойда-жоқта бір жағдай болды. БАҚ. ~ Ауылда оның айтқаны өтіп, атқаны жетіп тұрды». Екі аяғынан да айырылған ағамыз майдан госпиталінде жатып, әйеліне мынадай хат жазыпты … БАҚ.

АЙТҚАНЫ ӨТІП, АТҚАНЫ ЖЕТІП Read More

АЙТСАҢ СӨЗ, ҰРСАҢ ТАЯҚ ӨТПЕЙДІ

Жөн сөзге құлақ аспайтын, айтқан ақылды ұқпайтын, бетімен кеткен д.м. ~ Әлгі, Көпжасарды көрдің ғой? Ішпей жүрсе адам сияқты. Аузына шайтанның сідігі тиген соң мәңгүрт. Айтсаң сөз, ұрсаң таяқ өтпейді. Т.Рыс. ~ Өзін өлімге байлап, басын бәйгеге тіккен жан тәрізді. Оның да қасіреті ішінде. Бірақ сыр бермейтін. Айтса сөз, ұрса таяқ өтпейтін әйгілі арақкеш деп түсінеді ол. Т.Рыс.

АЙТСАҢ СӨЗ, ҰРСАҢ ТАЯҚ ӨТПЕЙДІ Read More

АЙТҚАНЫМ АЙТҚАН

Сөзім сөз, ойымнан қайтпаймын, мен не десем, сол болады деген мағынада; үзілді-кесілді пікір. ~ Шофер мырс етіп, май-май кепканың күн қағарын көзіне түсіре басып қойды. – Неге күлесің. Айтқаным айтқан. Бір қонамыз да, ертең ертелете жолға шығамыз. Қалайда ертең кешке үйде болуымыз керек. Ә.Нұрп. ~ Хадиша сәл тоқтағандай болды. Бірақ алғашқы райынан толық қайтпай: ─ Бәрібір жұрт оны өзінше түсініп кетті, – деді бұртиып. – Айтқаным айтқан… Т.Әбд.

АЙТҚАНЫМ АЙТҚАН Read More

АЙТҚАНЫН ЕКІ ЕТПЕДІ (ЕТКІЗБЕДІ)

Не айтса соны істеді; құлдық ұрды, құрдай жорғалады. ~ Өзі көзін ашқалы Аманғали байдың жылқысын бақты. Отымен кіріп, күлімен шықты. Айтқанын екі етпей, байдың бәйбішесіне жақты. Т.Әб. ~ Күз келді. Сабақ басталды. Оқуға беріле кірістім. Комсоргтың да айтқанын екі етпедім. Газет шығарысамын. Комсомол комитеті белгілеп берген көшедегі үйлерге барып газет оқып беремін, саяси үгіт айтамын. Н.Сер. ~ Апам тез-тез жүрді дегенше, бүкіл шалалықтан бой тартып, әскерше сымдай тартыла қалу қажет. Айтқанын екі еткізбеген ләзім. Әйтпесе… әй, қойшы, шапалағы әлі ащы. Е.Жең. ~ Келіншегі айтқанын екі еткізбейді, обалы не керек, әйтсе де күйеудің жарынан күтері сол екі етпеу ғана ма? М.Қаб. ~ …енді Байдалы шалды өз қолынан бастық сайлаған соң, айтқанын екі еткізбей орындатып Зибашты дереу бригадир қойғызды, сөйтіп, келіншектің көңілін алып, өз дегеніне жетті десті. С.Мұр.

АЙТҚАНЫН ЕКІ ЕТПЕДІ (ЕТКІЗБЕДІ) Read More