Әлдебір іске өзеурей кірісті, жанын салды. ~ Олардың көк желкесіндегі жоңғар қонтайшысының мұндай қазыналы өлкеге өлімін сатары, әрине, түсінікті.Ә.Кек. ~ Бірақ, бір еліріп алса, шамалыда сабасына түсе қоятын жылқы хайуан ба? Жолындағының бәрін кимелеп, өлімін сатып, өңмеңдей түседі.  Ә.Кек. ~ Біреу ағаш тостағанға толтырып ап бірдеңені әкеп ауызына тосады. Бұл өлімін сатып, қылқ-қылқ сіміре бастайды. Ә.Кек. ~ Қалай күйінбесін?! Осы алақандай ауылда еркек кіндіктің арақ дегенде өлімін сатпайтыны жоқ. Осы «сайтанның сідігінде» бейне әкелерінің құны қалғандай. С.Ел.

Өлімнен қорықпады, тәуекелге барды. ~ Дұшпаннан көрген қорлықтан Жалынды жүрек қан қайнап. Елді-жұртты қорғайлап, Өлімге жүрміз бас байлап! Ақтамберді жырау. ~ Өлімге бас тіккен азаматқа беттей алмай тобыр состиып тұрып қалған еді. С.Әбік. ~ Өлімге бас тіккен ақиықтар оқ бораса, кез келген шұңғыл- шұқырға бастарын тығып жата- жата қалады, сәл толастаса, жыра- жылға бойлай жүгіре жөнеледі. З.Қаб. ~ Аңду оңай. Андып жатып қағып тастауға болады. Андып жатқан жауды бас салу өлімге бас тіккенмен бірдей. Қ.Ысқ.

ӨЛІМГЕ БАСЫН (БЕЛ) БАЙЛАДЫ

Басын қатерге тігіп, тәуекелге барды. ~ Уәзірі айтып салды гүл-гүл жайнап, Өтірік болса, өлімге басын байлап. Әке менен шешеде ісі бар ма, Жалғыз ұл жүрген екен асық ойнап. «Қисса- и Қарабек»  ~ Бораған қар астында бар дүниеден баз кешіп, өлімге басын байлап жатқан дозақы қатынды жалғыз тастап кете алмай, қасында айналсоқтап аяғын сылтып басып жүр екен: шытыр-шытыр, пышыр-пышыр …  Ә.Нұрп. ~ Енді ештеңе де болмайды. Өлімге бел байлаған адамға ең қауіптісі алғашқы сағаттар ғой, ол артта калды. Үрейленбе.  С.Досан.

Артында қалған жалғыз перзент. ~ Қанша бала тапса да тәңірі тұрғызбады ғой, өлі туған жылбасқылардың соңынан аман қалған «өлім сарқыты» осы жалғыз ұл еді. А. Алт. ~ Паң да тәкаппар кемпір қазір қартайған, әсіресе маңдайына біткен өлім сарқыты — жалғыз қызының ерден қайтып келуі — қатты жүдетіп кеткен-ді. Ә.Сар.

Ажалы келіп қалды. ~ Мұғалім атымды атаса, дір ете қалам. – Тақтаға шық, – деді. Өлім сағаты жетті, құрыдым деп ойлаймын. Балалардың алдына шығарып алып, жер етпек қой. Б.Соқ. ~ Айғырлығы ұстаған қалың әскер шешініп, шамдарын сөндіріп, жамбастары төсекке тиген кезде екі жақтың біріне өлім сағаты таяған еді. Ғ.Біл.

Ажалы таяды. * Жақтары суалып, сақал- мұрты өсіп, өлім ноқтасы түскендей, көздерінің айналасы көгерістеніп, жанарлары өлегізіп қалған екен. Ш.Айт.

Қылмыскерді жазалаудың ең ауыр түрі, өмірінен айыру туралы үкім шығарылды. * … шаштараз оған кітаптарды бір-бірлеп беріп тұратын болады, ал өзі оларды қарап шығады — өйткені, бұлардың арасында өлім жазасына кесуге болмайтындары да кездесіп қалуы ықтимал. М. Серв. * Тағы болып өскен ол Женевада күндік жұмыс істеп тапқан ақшасын ішкілікке салады, жауыздық тіршілікпен жүріп, ақыры бір шалды өлтіріп, тонап тынады. Оны ұстап алып, соттап, өлім жазасына кеседі.  Ф.Дост. * — Қасиетті ағайындық қылмыскерлерді өлім жазасына кескенде, оларды бағанаға байлап қоятын да, садақпен атып өлтіретін.  М.Серв.

Ұятқа қалды, масқара болды. ~ «…Ұят болды, ұят емес, өлім болды. Өлімнен де жаман. Не деп қалды ана адам?!»  Х.Ес. ~ Өшпес ашу ойнаған, Сөнбес шырақ бір жанған, Алда майдан ту бұлғап, Шақырарда ер ұлан. Өлім болар құр қалған, Жолың болсын, жет соған! М.Әу.

Ажал айтып келмейді д.м.  ~ Ал, мына ноғайларға жүргенде тағы алысқа кетесің. Бас ауырып, балтыр сыздаса шет жер, жат ел, өлім бар да қаза бар деп, біреудің біреу басын сүйеп, сүйегін көмуге зар болады… І.Жанс. ~ Сатанның үйде болғанын мен де жек көрмеймін. Өлім бар да қаза бар… бір жерде болғанға не жетсін?  І.Жанс. ~ Екінші, өлім бар да, қаза бар. Бір-біріміздің қаза болғандарымызға уақытында көңіл айтып, бата жасаса алмасақ ренжіспелік. М.Шапи.

Ажалы тақады. ~ «Көретін жарық дүнием бар екен!»  – жаңа ғана өлім аузында тұрғаным естен шығып, шақырайған күнге бір қарағанымды білемін. Одан арғысы су қараңғы… Б.Тоғ. ~ Сөйлесуге тілі келмеді. Өлім аузында жатқан Асанға одан әрі қарауға ахунның дәті жетпеді. С.Ел.

Өле жаздады, әзер тірі қалды. ~ Қожаға қолын қаздырмай, қиғылық салып еді-ау!  Ақырында содан ауырып, өлім аузынан қалып еді-ау. Т.Әл. ~ … алты жасында жасырынбақ ойнап жүріп, кептіріп қойған холодильникке тығыламын деп қайтып шыға алмай өлім аузынан қалғаны бар. Қ.Ысқ. ~ …  бүкіл Жындысайдың жықпыл — қалтарысын қағып жүріп Әбдіжапардың қоймасын ақтарып қайтты.  Бірақ өзі де өлім аузынан қайтқан… Қ.Ысқ.