БІР ЗАМАТТА (ЗАМАТ)

Бір кезде, сәлден кейін. ~ Бауыздаған малша қырылдап, жаны шықпай біраз тыпырлады. Содан кейін атыс тоқтады. Мен әлі тірімін. Бір заматта үзенгі бауын салдырлатып, бір салдат бас жағыма келіп атынан түсті. Мылтығын сытырлатып оқтап атқалы жатыр. Мен жабысып жерге кіріп барам. Б.Нұр. ~ Бір заматта таяқ тастам жерде қараңдап келе жатқан бір адамның нобайы көрінді. Оң жағымда етпетінен жатқан Елемес құлағыма аузын тақап: − Дәу де болса анау келе жатқан Жәми шығар,- деді. С.Ом. ~ Темір айыр дөп тисе керек, бір кезде қызыл қауақ қақ бөлінді. Қауақтың ауыз жағы ит мойнында кетті. Сол бір замат қою айранға малынған иттің ала-құла тұмсығы көрінді. Т.Бер.

БІР ЗАМАТТА (ЗАМАТ) Read More

БІР ЖЫЛДЫҢ ТӨЛІ

Туған жылдары бір; құрдастар. ~ Қанша дегенмен бір жылдың төліміз ғой. Айтсаң, сөзің өтеді, – дейді құрдасына қарап күлімдеп. Ү.Жлк. ~ Бәріміз бір жылдың төліміз ғой, бірақ оның ой– өрісі, өмірге деген көзқарасы бәріміздікінен биік, бәріміздікінен жоғары. Біздің сөздік қорымыз жұтаң ғой, ал Елубай қай тақырыпқа болмасын желдей еседі. Қ.Жиен.

БІР ЖЫЛДЫҢ ТӨЛІ Read More

БІР ЖҰТЫМ

Азғана ғана, бір жұтқаннай қалмайтындай. ~ Көздей cap тостағанмен бір жұтым қымыз әкеп берді. Қартқожаның түрі — қымызымен бетке бір қойып, шығып кеткендей еді. Өйтуге дәрмән бар ма? Қымызға амалсыз қолын созды. Ж.Айм. ~ Маскүнем бір жұтым арақ үшін несін аяйды, бұл да билік үшін неміске ме, әзәзіл жын — шайтанға ма, кімге болса да, қызмет қылуға дайын. Т.Ахт.

БІР ЖҰТЫМ Read More

БІР ЖҰМЫРТҚАСЫ ІШІНДЕ

Ойын түгел айтпай, өзін-өзі тежеп қалды д.м. ~ Мен елге қайтамын ғой деп едім. Оған жарамды атым болмай отыр. Ат жөнінен мен бұларға жалынышты болып қалып отырмын. Мүмкіндігі болса, сен мені бұл қызметтен босатқын, — деп Демесұлын сендірдім. Бірақ та мен айтсам, болысполкомдер ісін өткізер еді… Қойшыбайдың установкасын есіме алып, бір жұмыртқам ішімде болып, сөйлескенім ғой. Б.Мом.

БІР ЖҰМЫРТҚАСЫ ІШІНДЕ Read More

БІР ЖӨНІ БОЛАР

Бір амалы табылар. ~ Тумысынан көргенсіздеу, сіңірі шыққан кедей отбасы ғой. Құдаң да оңып тұрған жоқ. Үндемей қабатын төбет сияқты. Бірақ жомарттық мінезі де жоқ емес. – Алдап– сулап, еркіне жіберіп барып, алыстан қайырмаймысың?– Бір жөні болар. Т.Рыс. ~ Аралбай көзі алақтап, тыпыршып отыр. ─ Бір жөні болар, қояр, бітісерміз, – деп бет алды бірдеңелерді айтып, жәреукелене берді. С.Ом. ~ Ия, әңгіме сонда ғой, балам. Қазір шлюзге қарайтын кез бе. Соғыс болса мынау. Шлюзсіз де бір жөні болар. Ш.Айт.

БІР ЖӨНІ БОЛАР Read More

БІР ЖӨН

Бір басқа; бөлек әңгіме. ~ «Япырай! » – деді де сөзінің аяғын жалғастырмай қойды. Оның жалғасында ағаның ініге деген жанашырлығы жатқанын сездім. Алматы болса бір жөн. Мәскеуге иісі қазақтың билігі жүрмейтініне, бөтен жұрт бөстегіне де отырғызбайтынына өкінген секілді. Қ.Ысқ. ~ Барқ еткен зәрлі дауыстың жақсы лебіз еместігін Түгел түсінді. Өз басы болса бір жөн. Тегістің жайы не болмақ? Ү.Жлк.

БІР ЖӨН Read More

БІР ЖОЛҒЫ

Бір реткі, осы орайдағы. ~ Кәдендер аттан түсер емес. Осы арада қадау– қадау әңгіме болды. Кәден Күржіктің бас бәйге алғанын, әлі теріскей аспағанын айтып өтті. Сөзінің соңында: – Ноғайқұл, саған Күржіктің бір жолғы терін кештім. Түсірген олжасын қидым. Ал енді атымды өзіме қайтар. Қандасып қайтеміз?! – деген Соппек жорта қыр көрсетті. Т.Әл. ~ Сауға, көке! – деді Ноян ағасына жалына қарап. – Бір жолғы олжаңды маған қи!.. – Баянның жүрегіне біреу қанжар сұғып алғандай болды. І.Ес.

БІР ЖОЛҒЫ Read More

БІР ЖОЛҒА (ЖОЛҒЫ) АШУЫҢДЫ БЕР (ҚИ)

Ашуыңды бас, сабаңа түс, қызбаланба. ~ Қой енді, көкесі! Бір жолға ашуыңды маған бер. Машина деген темір емес пе? Сол темір үшін бауырыңның көңілін қарайтпа. Соқталдай жігітті төмен етек әйелдердің алдында сабап, сағын сындырма! Біз көрмесек етті! Ә.Тар. ~ Қасында таяу тұрған Тыныбай да солай ойласа керек. – Үкірдай, есіңізді жиыңыз! Осы пәленің қанына ортақ болып қайтесіз… Маған қишы бір жолғы ашуыңды! — деп араша тілегендей көлденеңдей берді. Қ.Жұм.

БІР ЖОЛҒА (ЖОЛҒЫ) АШУЫҢДЫ БЕР (ҚИ) Read More

БІР ЖОЛАТА (ЖОЛА)

Құлан таза, бүтіндей, ада-гүде, басыбайлы. ~ Тағы жұт қарыныңды томпайтпасам, Болмассың бір жолата шоңқайтпасам. Қыл көпір, тас таразы құрылғанда, Аузым жоқ әзір менің, сонда айтпасам! Шәк. ~ Мапуфаңның соңғы сөзінен, Елісхан қатты іш жиды. Қияс мінезі оны дағдарта бастады: «Өлсем де ол жағына беттемей өлем! Бір жолата құрықты қолына алса, қайырылып өзіме салмай ма?» – деп мойынды қашыққа салғысы келді. Т.Рыс. ~ Қызметкерлер қызды зынданға тастады. Сонан кейін Қытай өлкесі Ұжданнан бір жола босады… Шәк.

БІР ЖОЛАТА (ЖОЛА) Read More

БІР ЖЕРДЕН ШЫҚТЫ

Сөздерінде алалық болмады. ~ Кеңесте қолайлы сәтті қолдан бермей, таяу арада аттаныс жариялауды жақтаған пікірлер де аз болған жоқ. Бұл жөнде қашанда желдің өті, жаудың бетінде жүретін Керей, Найман батырлары мен Төле бастатқан Ұлы жүз билерінің сөзі бір жерден шықты. Қ.Жұм. ~ «Жаудың күш–қуатын білу керек»,– деп ойлады Дьяков. Атын борбайлап штабқа шауып келді. Құрама командирлерімен ақылдасты да бәрінің ойы бір жерден шыққан соң, сол бойда дереу Еламанды шақырып алды. Ә.Нұрп.

БІР ЖЕРДЕН ШЫҚТЫ Read More