БІР АЖАЛДАН ҚАЛДЫ

Әлдебір үлкен қауіптен аман-сау құтылды. ~ Бесте болатынсың. Со жолы бір ажалдан қалып ең. Сала құлаш жайынды судан суырып алып, қайыққа қайырып тастағанымда, шоршып тулап, быт-шытымызды шығара жаздаған-ды. Есіңде ме сол? Э.Хэм. ~ Күйеуі көлік апатынан аман қалып, садақа жасады. Молда шақыртып, Құран оқытты. − Жаратқан иемізге алғыс айтуы дұрыс, бір ажалдан қалған екен ғой бақыр, − деді. Осы сәт… Лияның қалың тұманы сейіліп, көп нәрсе анықталған сәт… АҚ «Эрзац». ~ Лажы таусылған аға лейтенант алты атарын қорабына салып, акоп ішімен кете барды. Қабылдаға қарасам, өң жоқ, түс жоқ ағыл тегіл жылап отыр екен. — Қалқам Жанахмет бір ажалдан қалдық. Сені атып тастаса мен елге қалай жетемін деп кемсеңдейді. АҚ «Тағдыр».

БІР АЖАЛДАН ҚАЛДЫ Read More

БІР АДЫМ ШЕГІНБЕДІ

Қасарысты, төтеп берді. ~ Бір адым шегінбеңдер! — дедім, қысылыс үстінде жоғарғы командованиенің аты шулы әмірін тағы бір еске түсіріп. Бұл Отан әмірі, оны адал ұлы бұза алмайды. Ғ.Мүс. ~ Батырдың денесін тастамай алынған шептен бір адым шегінбеуді бұйырған Кенесарының әмірімен Ағыбай, Иман және Наурызбай батырлар бастаған жасақтар қалаға қайта басып кіріп, күлін көкке ұшырды. C.Ақт.

БІР АДЫМ ШЕГІНБЕДІ Read More

БІР АДЫМ АТТАМАЙДЫ

Түк істемейді, шөптің басын сындырмайды; онсыз күні жоқ. ~ Күні кеше бұл екі колхоздың арасына жаяу жүгіріп кете беруші едік. Енді жұрт машинасыз бір адым аттамайды. Бұл күнде екі арадағы жалғыз аяқ суыртпақ жол да жоғалған. Ш.Мұр. ~ Өзі сұйық ішпесе бір адым аттамайтын есектен бетер пақыр екен. Бағанағы алып кеткенім жұмырына жұқ болмады — деп, Рахия алдына қойған бір кесе шәйдi суытпай-ақ сіміріп сап, «тағы құй» дегендей кесені шиіріп жіберді. Қ. Түм.

БІР АДЫМ АТТАМАЙДЫ Read More

БІР АДАМДАЙ КӨРМЕДІ

Саны көп дұшпанын оп-оңай қырып салды. ~ Етіне киген жейде еді, Маңдайы шып-шып терледі. Біршымбайдың қайраты Барған сайын өрледі. Самсап тұрған ерлерді Бір адамдай көрмеді. «Қара Қыпшақ Қобыланды».

БІР АДАМДАЙ КӨРМЕДІ Read More

БІР АДАМДАЙ

а) Тәп-тәуір, ешкімнен кем емес д.м. ~ «Пайғамбар да күйеуін сыйлаған» деп ешкім мұның бетінен қаққан жоқ. Жылқының бабын бір адамдай біледі. Өзіне де бір үйір жылқы бітті. К.Қаз. ~ Бай үйінің айран-шалабын көз сатқанша, еліне қосылған көп артық. Аштан өліп жатқан ешкім жоқ. Әкесі бір адамдай күнін көреді. З.Шүк. ~ Өзіне салса, балдырлардың арасынан мәңгілік орын тапса, ешбір өкінбейді. Былайғы өмірдің қызық– шыжығын бір адамдай көрді ғой. Қалғаны жер басып тірі жүргендерге… Қ.Жиен.
ә) Ұйымдасқан түрде, жинақы әрекет етті. ~ Жауынгер түгел, жолдас лейтенант! Сигнал бойынша бәрі бір адамдай вагонға мінді,– деп баяндады Байсарин. Т.Ахт. ~ Ал үш бұрыштың артқы екі бұрышында келе жатқан екі жігіт алдындағы бала жауынгерге төніп солдаттарды қағып тастап отырады. Осылай бір адамдай қимылдаған үш жігітті қандай жау болса да ала алмайды. І.Ес. ~ Қуаланды қу байтал халімде жарық көрді. Жұрттың бәрі бір адамдай жақсы қабылдады. Көргісі келмегендер көрмей-ақ қойсын. М.Мақ.

БІР АДАМДАЙ Read More

БІР АҒАТТЫҚ КЕТТІ (ӨТТІ, ЖАСАДЫ)

Жаңсақ басты, қате жіберді. * Тыңдай беріңіз. Кешегі ұлы Отан соғысында жүрген кезімде мен бір ағаттық жасадым. С.Шайм. * Қасында қонақтарың бар, жай да емес, қалам ұстаған жігіттер. Бұлардан ол да бір ауыз ілтифат күтеді. ─ Бір ағаттық кеткен екен. ─ Оны түзету қиын емес қой. Қ.Ысқ. * — Мәке! Бір ағаттық өтті. Білместік менен болды. Шарбағым құлап жатыр… ешкі кебенектің жүрмейтін жері жоқ. Бақшамды таптап… Үйге қайтайын, ә… С.См. Төлебай ағаны білдім. Анау кім екенін түсінбедім. — Төлебайға мойын бұрды. – Сіз де кешіріңіз, аға, ініңізден бір ағаттық өтті. Енді қайталанбайды. Б.Ыбыр. * Сіңлім, әлгінде өкпелеп қалған жоқсың ба? — Тәте-ау, неменеге өкпелейін. Қайта, сіз… мені кешіріңіз… Бір ағаттық жасап алғаным… С.См.

БІР АҒАТТЫҚ КЕТТІ (ӨТТІ, ЖАСАДЫ) Read More

БІР АБҰЙЫРЫ (АБИЫРЫ)

Сәті болғанда; бір жақсысы. ~ Құлагер болмағанда кім екенін бай аңдап қалатын еді. Бір абұйыры жүйрік аттың арқасында жігіт құтылып кетті. Ж.Айм. ~ «Бір абұйыры, жалғыз екен, — деді шал іштей бір есеппен. — Бұған тағы біреуі қосылып, екі жақтамаса болғаны. Біреуіне алдыра қоймаспын» деп кісесінен үлкен қара кездігін алып, қолына оңтайлап ұстап жүрді. Қ.Жұм. ~ Тегінде, Әзиевті суқаны сүймейді. Тереңдеп ештеңені ойлай алмайтын болбыр адам сияқты. Әйтеуір, бір абиыры — туыстары көп. С.Мұр.

БІР АБҰЙЫРЫ (АБИЫРЫ) Read More

БІР АБҰЙЫРСЫЗДЫҒЫ

Қырсық шалғанда; ұят болғанда д.м. ~ Кездікті қалың теріге қадап, қолмен де іреп сыпыра бастадым, ол сөйлеп жатыр: «Үйіме жетіп, мал жаруды үйренгеннен былай қыр елінің жылқысынан жылқы қоймадым… Қысқартыңқырап айтайын, содан алдыңғы жылы ғана қапы соғып қақпанға түстім. Бір абұйырсыздығы ұлы дәретке отыра беріп, нақ қыл құйрықтан түскенім. Шайнап тастайын деп бұрылсам, аузым жетпейді. Ж.Айм.

БІР АБҰЙЫРСЫЗДЫҒЫ Read More

БІР (ЕШ) ӨТІРІГІ ЖОҚ

Айдан анық шындық. ~ Рас, рас… ─ деп Алтын көзін сүртті. — Бір өтірігі жоқ. Оны інім деп қалай жақтайын, ісі қисық болса… С.Шай. ~ Бұл үшін мемлекеттен миллиондаған сом ақша алады!—дедім мына мен. — Ал енді өздерің көріңдер! Мен осында өтірік айттым ба? — Бір өтірігі жоқ. С.Бақ. ~ Ол тегінен салмақты, біртоға бала болатын. Көп нәрсені, әсіресе кербездікті, тектілікті содан үйрендім десем бір өтірігі жоқ. О.Бөк. ~ Бұл келіншектің сұлу жүзін, жұмыр мойнын, сол¬қылдаған денесін құмарта бір шолып өтті де, құданың құдыреті, сол жерде ғашық болды да қалды. Еш өтірігі жоқ. Т.Сәу.

БІР (ЕШ) ӨТІРІГІ ЖОҚ Read More

БІР (АСТЫҢҒЫ) ЕРНІМЕН ЖЕР ТІРЕП, БІР (ҮСТІҢГІ) ЕРНІМЕН КӨК ТІРЕП

Ерекше күш-құдырет иесінің сипаты. ~ Алты ат кетіп қалған соң, Бір сарғыш ат келеді Жауған күндей сіркіреп, Жарылған жердей күркіреп, Бір ернімен жер тіреп, Бір ернімен көк тіреп. «Ер Қосай». ~ Наполеон үстіңгі ернімен көк тіреп, астыңғы ернімен жер тіреп, даңқы әлемді тітірентіп тұрғанда, қыз құрып қалғандай, Жозефина деген жесір әйелге үйленіпті. Ш.Мұр.

БІР (АСТЫҢҒЫ) ЕРНІМЕН ЖЕР ТІРЕП, БІР (ҮСТІҢГІ) ЕРНІМЕН КӨК ТІРЕП Read More